myTU другі год запар у топ-100 самых хуткарослых стартапаў DACH і CEE паводле версіі Sifted

Стартап myTU другі год запар увайшоў у Sifted 100: DACH & CEE — рэйтынг самых хуткарослых тэхналагічных кампаній Цэнтральнай і Усходняй Еўропы і нямецкамоўных краін. У 2026 годзе стартап заняў 88-е месца, апусціўшыся на 15 пазіцый у параўнанні з рэйтынгам 2025 года.

Sifted ранжыруе кампаніі па сярэднегадавым росце выручкі за два гады (CAGR). У myTU, паводле рэйтынгу, гэты паказчык склаў 56,53%, а апошняя раскрытая гадавая выручка — €1,2 млн. У профілі кампаніі таксама ўказаны £16 млн прыцягнутага фінансавання і каманда з 27 чалавек.

У цэлым тэмпы росту ўдзельнікаў рэйтынгу ў гэтым годзе паскорыліся: сярэдні двухгадовы CAGR соткі склаў 157,6% супраць 145,8% годам раней. Сярэдняя выручка вырасла з €24,2 млн да €35,3 млн, а медыянны аб’ём прыцягнутага фінансавання — з €14,7 млн да €16 млн. Фінтэх разам з B2B SaaS стаў найбуйнейшай вертыкаллю рэйтынгу: на кожны сегмент прыпадае па 32% кампаній.

Стартап myTU заснаваны ў 2019 годзе і базуецца ў Вільні. Развівае лічбавыя фінансавыя сэрвісы (P2P-плацяжы, бізнес-рахункі, карты і інш.) для прыватных і бізнес-кліентаў, мае ліцэнзію ўстановы электронных грошай у Літве.

Рэйтынг Sifted ахоплівае стартапы з 25 краін. Паводле метадалогіі, кампаніі мусяць быць заснаваныя не раней за 2010 год, мець не менш за €500 тыс. выручкі за апошні справаздачны год і прадставіць пацвярджальныя дакументы. Першае месца ў рэйтынгу 2026 года заняў чэшскі фінтэх Flowpay з двухгадовым CAGR 816,31%.