У Варшаве пройдзе хакатон сацыяльных праектаў «Кааператыў» з прызавым фондам €35 000

30–31 кастрычніка Школа кампетэнцый правядзе ў Варшаве хакатон «Кааператыў». Ён аб’яднае да 100 удзельнікаў з бізнесу, тэхналогій, адукацыі, медыя, культуры і сацыяльнай сферы. За два дні ім трэба будзе сфармаваць каманды, распрацаваць канцэпцыі сацыяльна значных праектаў і прадставіць іх журы. Пераможцы атрымаюць фінансавую падтрымку з агульнага прызавога фонду €35 000 і прызы ад партнёраў.

Арганізатары шукаюць праекты, якія ствараюць новыя магчымасці для супольнасцяў: дапамагаюць людзям атрымліваць першы прафесійны досвед, аб’ядноўваюць спецыялістаў, дазваляюць тэставаць ідэі і запускаць новыя ініцыятывы. Прыйсці на хакатон можна не толькі з гатовай ідэяй, але і з рэсурсам ці прафесійнымі навыкамі, якія ўдзельнік гатовы прапанаваць будучай камандзе.

У праграме — пітчынг ідэй, фармаванне каманд, праца з ментарамі і экспертныя выступы. Сярод ментараў — заснавальнік DŌBRA impact venture studio Аляксандр Скрабоўскі, эксперт EBRD і выкладчык Kozminski University Дзмітрый Дзічкоўскі, сузаснавальнік VONDEL Аляксандр Васілевіч, спецыялістка па фандрайзінгу Аліна Яблонскі, CBDO ў Blinger.io і Alma Agency Арцём Карпечанка і іншыя. Удзельнікі разбяруць, як правяраць запатрабаванасць ідэі, знаходзіць фінансаванне, выбудоўваць партнёрствы і рыхтаваць пераканаўчы пітч. Завершыцца хакатон 31 кастрычніка прэзентацыяй праектаў перад журы.

Удзел бясплатны, але неабходная рэгістрацыя. Для іншагародніх прадугледжаная магчымасць кампенсацыі пражывання ў Варшаве і праезду наземным транспартам. Дэдлайн падачы заявак з запытам на падтрымку на паездку — 20 кастрычніка, для ўдзельнікаў з Варшавы і тых, каму кампенсацыя не патрэбная, — 28 кастрычніка.

Праграма і падрабязнасці