Чаму BYGRIDпачынаеццаз HealthTechі навошта ўсё гэта?

Прывітанне! На сувязі Юля Нехай, рэдактарка і заснавальніца BYGRID. Нарадзілася ў Мінску, па адукацыі журналістка, апошнія 10 гадоў працую са стартапамі. Пару гадоў таму злавіла сябе на думцы: я ведаю сотні праектаў з беларускімі каранямі, але слаба разумею, што з імі адбываецца ў цэлым. За апошнія гады фаўндары добра так раз’ехаліся па свеце.

Адны развіваюць бізнес у Варшаве, іншыя ў Лісабоне, Амстэрдаме, Лондане ці Сан-Францыска. Каманды прыцягваюць інвестыцыі міжнародных фондаў, прадаюць на глабальных рынках, становяцца часткай стартап-экасістэм іншых краін і кантынентаў. І гэта – добрая навіна.

Кепская навіна ў тым, што разам з геаграфіяй разышоўся досвед, а дзяліцца ім сталі менш. Стартап у Даніі вывучыў, як уладкаваны мясцовы HealthTech, у каго прасцей падняць грошы. Фінтэх у Польшчы прайшоў працэдуру ліцэнзавання і можа ў фарбах расказаць, у чым практыка моцна разыходзіцца з тэорыяй. B2B у Сан-Францыска набіў шмат гузоў і зразумеў, як сёння прадаваць амерыканскаму энтэрпрайзу. А нехта зрабіў няўдалы півот, страціў паўгода і цяпер ведае, як рабіць не трэба. І пагадзіцеся, такія інсайты значна цікавейшыя за чарговы расказ пра тое, як «мы паверылі ў ідэю і сабралі выдатную каманду». Але большая частка гэтых ведаў сёння застаецца ўнутры каманд, сяброўскіх чатаў ці размоў пасля івэнтаў.

Таму BYGRID з’явіўся з простай ідэяй: дзяліцца не толькі навінамі пра раўнды і паспяховае маштабаванне. Але і тым, што часта застаецца за кадрам: рашэнні, памылкі, лічбы, практыкі, якія працуюць, гіпотэзы, якія не працуюць. Дзе шукаць першых кліентаў? На якім этапе спатрэбіўся лакальны партнёр? Чаму не спрацавала бізнес-мадэль? Якія магчымасці адкрыліся, калі кампанія перабралася ў іншую экасістэму? Чым больш рынкаў спрабуюць фаўндары-беларусы, тым больш калектыўнага досведу з’яўляецца. І класна, калі гэты досвед цыркулюе.