Шэсць металічных клавіш з сімваламі штампа, ноты, гукавой хвалі, дакумента, дома і графіка

ІлюстрацыяBYGRID

ЭкасістэмаBYGRID Connect

2 000 выкладчыкаў, якія плацяць, 30 кавярняў-кліентаў і рост без рэкламы: чым жывуць шэсць беларускіх стартапаў Каманды з Польшчы, ЗША і Літвы — пра першых кліентаў, манетызацыю і наступны этап развіцця

За два месяцы колькасць выкладчыкаў, якія плацяць за сэрвіс MOOZ, падвоілася і дасягнула 2 000. Staaamp падключыў 30 устаноў-кліентаў, але пакуль не бярэ з іх грошай. Paperspell прыцягвае карыстальнікаў пераважна без рэкламы, а SynchroGen правярае попыт на AI-інструменты для аўдыядэскрыпцыі. Мы абралі шэсць стартапаў з карты BYGRID і спыталі, што ў іх ужо атрымалася, якія гіпотэзы пацвердзіліся і над чым каманды працуюць цяпер.

6 хв чытання

Змест

Беларусы будуюць кампаніі ў розных краінах і часам нават не ведаюць, што хтосьці з суайчыннікаў працуе ў той жа нішы, вырашае падобныя задачы або ўжо прайшоў праз тыя ж цяжкасці. Менавіта для гэтага мы запусцілі карту BYGRID — каб каманды маглі знаходзіць адна адну, абменьвацца досведам, шукаць партнёраў і кліентаў.

Нам цікава назіраць за стартапамі з самага пачатку: як яны знаходзяць першых карыстальнікаў, правяраюць гіпотэзы, выходзяць на выручку, маштабуюцца. Таму на BYGRID мы распавядаем не толькі пра кампаніі з буйнымі раўндамі і ўражлівымі метрыкамі, але і пра тыя каманды, якія адпавядаюць крытэрыям адбору, стварылі прадукт і пачалі працаваць з рынкам. Хто ведае, у што вырастуць гэтыя праекты праз некалькі гадоў?

01Праграма лаяльнасці для кавярняў і салонаў

Staaamp, Польшча. 30 устаноў-кліентаў падключыліся. Калі пачынаць браць грошы?

Staaamp — праграма, якая замяняе папяровыя карткі лаяльнасці лічбавымі штампамі.

У Польшчы незалежны лакальны бізнес — кавярні, барбершопы, салоны прыгажосці, невялікія крамы — і сёння карыстаецца папяровымі картамі для праграм лаяльнасці. Але кліенты часта іх губляюць або забываюць, таму такія карты рэдка дапамагаюць вярнуць наведвальніка, а ўладальнікі бізнесу не маюць звестак пра сваіх пастаянных кліентаў. Праграмы лаяльнасці вялікіх сетак занадта складаныя і дарагія для асобных устаноў, таму ў малога бізнесу часта наогул няма эфектыўнай прылады для ўтрымання кліентаў.

У Staaamp ужо больш за 6 000 усталяванняў, каля 1 200 актыўных карыстальнікаў у месяц і 30 устаноў-кліентаў. Як кажа каманда, паказчыкі ўцягнутасці стабільныя на працягу ўсяго года: траціна карыстальнікаў вяртаецца кожны тыдзень, што адпавядае тыповай частаце наведванняў лакальных кавярняў або барбершопаў.

Для ўстаноў сэрвіс пакуль бясплатны, выдаткі на развіццё праграмы пакрываюць самі заснавальнікі. Яны палічылі, колькі кропак трэба падключыць, каб платная мадэль пакрывала аперацыйныя выдаткі. Цяпер задача — дайсці да гэтай колькасці і ўвесці тарыфы, за якія невялікія ўстановы будуць гатовыя плаціць.

02Платформа для анлайн-урокаў музыкі

MOOZ, ЗША. За два месяцы падвоілі колькасць кліентаў, якія плацяць за сэрвіс. Што далей?

MOOZ распрацоўвае спецыялізаваную платформу для музычнага навучання. Яна дае студыйную якасць гуку і прапануе прафесійныя інструменты для педагогаў, дапамагаючы ім утрымліваць вучняў і развіваць свой бізнес.

Да пачатку COVID-19 рынак анлайн-навучання музыцы быў зусім невялікі. Але пандэмія даказала, што выкладчыкі музыкі могуць працаваць дыстанцыйна і вучыць студэнтаў па ўсім свеце. Па словах каманды, у стартапа сфарміравалася актыўная супольнасць выкладчыкаў музыкі. Праграма прыносіць грошы: за апошнія два месяцы колькасць выкладчыкаў, якія плацяць за сэрвіс, падвоілася і дасягнула 2 000 у 86 краінах.

Цяпер каманда MOOZ хоча маштабавацца: павялічваць аб’ём платнага прыцягнення кліентаў, захоўваючы прымальныя паказчыкі кошту прыцягнення (CAC) і акупнасці. А яшчэ данесці да выкладчыкаў думку, што для якаснага анлайн-навучання недастаткова проста «аптымізаваць» выкарыстанне Zoom.

03AI-рэдактар аўдыядэскрыпцыі

SynchroGen, Польшча. AI робіць чарнавік. Хто вырашае, што пачуе глядач?

SynchroGen стварае студыю для вытворчасці аўдыядэскрыпцыі (тыфлакаментавання) з выкарыстаннем AI. Гэта закадравае апісанне таго, што адбываецца на экране, якое дапамагае незрачым і слабабачным сачыць за сюжэтам.

Па словах членаў каманды, задача, над якой яны працуюць, цікавая тым, што ўкараненне AI не замяняе людзей, якія выконваюць гэтую работу. Цалкам аўтаматызаваная генерацыя апісанняў часта памыляецца ў кантэксце, танальнасці і таймінгу, таму супольнасць людзей з парушэннямі зроку справядліва адхіляе такія рашэнні. Каманда SynchroGen распрацавала прафесійны рэдактар для спецыялістаў па аўдыядэскрыпцыі, у якім AI выступае ў ролі памочніка: складае чарнавікі сцэнарыяў на аснове аналізу сцэн, генеруе сінтэзаванае маўленне, сінхранізуе ўсё гэта з таймлайнам. Пры гэтым кантроль застаецца за спецыялістам.

Але аўдыядэскрыпцыя — толькі пачатак. Зараз у бэта-версіі даступная функцыянальнасць для стварэння субцітраў. Мэта каманды — стварыць адзіны інструмент, які ахопіць усе працэсы забеспячэння даступнасці кантэнту і пазбавіць студыі неабходнасці звяртацца да розных падрадчыкаў для кожнага фармату.

На цяперашні момант каманда падпісала тры лісты аб намерах (LOI), прыцягнула актыўных бэта-тэстароў і праверыла рашэнне разам з польскімі НДА, якія займаюцца пытаннямі даступнасці.

04Пераклад і разбор асабістых дакументаў пры пераездзе

Paperspell, Польшча. Як стварыць AI-навігатар па бюракратыі для эмігрантаў?

Уявіце, што вы пераехалі ў Польшчу з сям’ёй: дамова арэнды ўжо падпісана, дзіця яшчэ трэба запісаць у школу, а з перапіскі са страхавой кампаніяй усё яшчэ незразумела, калі пачне дзейнічаць поліс. У Paperspell можна пачаць з простага пытання: «Што мне рабіць?»

Праграма ўдакладніць акалічнасці, звярыць іх з вашымі дакументамі і пакажа, якія крокі можна зрабіць ужо цяпер, чаго не хапае, якія тэрміны важна не прапусціць. У перспектыве падкажа і тое, пра што вы самі маглі не спытаць: напрыклад, на якую дапамогу можа прэтэндаваць ваша сям’я? Будучая канкурэнтная перавага Paperspell — спалучэнне асабістага кантэксту і досведу людзей, якія ўжо прайшлі той жа шлях.

Сёння Paperspell перакладае і тлумачыць асабістыя дакументы, знаходзіць у іх важныя даты, нагадвае пра тэрміны, працуе з электронным подпісам і інш. Важна: на ўваход у праграму можна паставіць асобнае біяметрычнае блакаванне. Паводле звестак каманды, цяпер у Paperspell зарэгістраваныя 1 500 карыстальнікаў. Прырост у асноўным арганічны.

05Праграма для рамонту і абслугоўвання жылля

jDOM, Польшча. Навошта аб’ядноўваць уладальніка жылля і майстра ў адной праграме?

jDOM — двухбаковая платформа для абслугоўвання і рамонту жылля.

Уладальнікі нерухомасці атрымліваюць лічбавы архіў свайго аб’екта (дакументы, гарантыі, планы, гісторыю абслугоўвання) і структураваную прыладу для замовы рамонтных або сэрвісных работ. А прафесіяналы атрымліваюць AI-памочніка для складання кашторысаў, лёгкую CRM-сістэму і агульную працоўную прастору з кліентамі, што дазваляе ператвараць прапановы ў рэалізаваныя праекты. Паколькі платформа працуе глабальна, спецыялісты таксама маюць доступ да аналітыкі бізнесу і рэкамендацый па развіцці, заснаваных на тэхналогіях штучнага інтэлекту.

На сучасным этапе ў сэрвісу ёсць бэта-карыстальнікі.

06Аналітыка рэкламы і адсочванне канверсій

RedTrack, Літва. Як перабудаваць бізнес, які з’явіўся да AI-буму?

У гэтай падборцы RedTrack — найбольш сталы стартап: у 2024 годзе кампанія прыцягнула €2,9 млн у межах раўнда Series A. Праект дапамагае малому і сярэдняму бізнесу зразумець, якая рэклама прыводзіць да куплі, і эфектыўна кіраваць кампаніямі.

Паводле звестак RedTrack, платформай карыстаюцца больш за 5 000 медыябайераў. У 2026 годзе сэрвіс адсочваў у сярэднім $275 млн рэкламных выдаткаў за месяц.

Цяпер каманда вылучае дзве задачы: як у эпоху AI развіваць сэрвіс, які з’явіўся да буму генератыўных мадэляў, і як арганізаваць працу цалкам аддаленай каманды па меры росту.

Калі матэрыял быў карысны, пачастуйце рэдакцыю кавай. Ваша падтрымка дапамагае нам працягваць размаўляць з фаўндарамі і дзяліцца іх досведам.

Пачаставаць рэдакцыю кавай (адкрыецца ў новай укладцы)
Падзяліцца